రూ.2తో ఓటు సవాల్‌

నల్గొండ కలెక్టరేట్‌: ఓటును సవాల్‌ (ఛాలెంజ్‌) చేసే అవకాశం పోలింగ్‌ కేంద్రంలో కూర్చునే ఏజెంట్‌కు మాత్రమే ఉంటుంది. పోలింగ్‌ బూత్‌లోకి ఓటు వేయడానికి వచ్చిన వ్యక్తి ఓటరు జాబితాలో ఉన్న పేరుకు సరిపోదని అనుమానం కలిగినప్పుడు ఏజెంట్‌ ప్రిసైడింగ్‌ అధికారికి రూ.2 చెల్లించి సవాలు చేయడానికి అవకాశం ఉంది. ఓటు వేయడానికి వచ్చిన వ్యక్తి వయసు, తండ్రి పేరు, అతను తీసుకొచ్చిన గుర్తింపు కార్డును పరిగణనలోకి తీసుకుని అతడి బంధువులు లేదా ఓటరు జాబితాలో అతని ఇంటి దగ్గర్లోని వారిని సాక్షులుగా నియమించి వారితో ప్రమాణం చేయించి విచారణ చేపడతారు. సదరు ఓటరు బోగస్‌ అని తేలితే అతడిపై ఫిర్యాదు చేసి పోలీసులకు అప్పగిస్తారు. ఒక వేళ అతను జాబితాలో ఉన్న విధంగా ఓటరే అయితే ఓటు వేయడానికి అనుమతి ఇచ్చి, సవాల్‌ చేసిన ఏజెంట్‌ ఓడిపోయినట్లు తీర్మానించి అతను చెల్లించిన రూ. 2ను ప్రభుత్వానికి అప్పగిస్తారు. ఒక వేళ ఏజెంట్‌ తన సవాల్‌లో గెలిస్తే రూ. 2ను పీఓ తిరిగి ఏజెంట్‌కు ఇచ్చేస్తారు.