భాజపాని విమర్శిస్తే.. అవినీతిపరులా: జూలకంటి

మాడ్గులపల్లిలో మాట్లాడుతున్న సీపీఎం రాష్ట్ర కార్యదర్శివర్గ

సభ్యుడు జూలకంటి రంగారెడ్డి, చిత్రంలో నాయకులు

మాడ్గులపల్లి, న్యూస్‌టుడే: భాజపా, మోదీని విమర్శించే వారు.. అవినీతి పరులంటూ ముద్రలు వేస్తున్నారని, కానీ ఆ పార్టీకి చెందిన వారే అత్యంత అవినీతి పరులని సీపీఎం రాష్ట్ర కార్యదర్శివర్గ సభ్యుడు, మాజీ ఎమ్మెల్యే జూలకంటి రంగారెడ్డి ఆరోపించారు. మాడ్గులపల్లిలోని సీపీఎం కార్యాలయంలో నిర్వహించిన విలేకర్ల సమావేశంలో ఆయన మాట్లాడారు. భాజపాను సమర్ధిస్తే మంచివాళ్లని.. లేదంటే అవినీతి పరులంటూ జైళ్లకు పంపిస్తారన్నారు. ఇద్దరు సీఎంలను జైలుకు పంపించి మోదీ నియంతృత్వ పాలనను అవలంబిస్తున్నారని విమర్శించారు. ఎన్నికల బాండ్ల పేరుతో భాజపా రూ.లక్షల కోట్లు దోచుకుందని ఆరోపించారు. ప్రజా అవసరాలను తీర్చాల్సిన కేంద్ర ప్రభుత్వం మతం పేరుతో రాజకీయాలు చేస్తే ప్రజలు క్షమించబోరన్నారు. ఇండియా కూటమికి మద్దతుగా నల్గొండ లోక్‌సభ కాంగ్రెస్‌ అభ్యర్ధి రఘవీర్‌రెడ్డి గెలుపు కోసం పూర్తి సహకారం అందిస్తామన్నారు. కార్యక్రమంలో మండల కార్యదర్శి రొండి శ్రీనివాస్‌, సహాయ కార్యదర్శి పుల్లెంల శ్రీకర్‌, పాదూరి గోవర్థని, వెంకటాచారి తదితరులు పాల్గొన్నారు.