ఉలవపాడులో స్టిక్కర్ల దుమారం

వైకాపా స్టిక్కరు అంటించిన యువకులతో మాట్లాడుతున్న ఎంపీడీవో విజయలక్ష్మి

ఉలవపాడు, న్యూస్‌టుడే: మండల కేంద్రంలో సోమవారం వైకాపా గుర్తుతో స్టిక్కర్లు అంటించడంపై దుమారం రేగింది. వివిధ జిల్లాలకు చెందిన ఆరుగురు యువకులు ద్విచక్రవాహనాలపై వచ్చి పంచాయతీ కార్యాలయం సమీపంలోని ఇళ్లకు వైకాపా స్టిక్కర్లు అంటించారు. ఇది గమనించిన స్థానికులు ప్రశ్నించడంతో తాము అంటించలేదని చెప్పడంతో.. వారు వెంటనే మండలాధికారులు, పోలీస్‌స్టేషన్‌కు ఫోను ద్వారా తెలియజేశారు. దీంతో అక్కడకు వచ్చిన పంచాయతీ సిబ్బంది.. ఆ స్టిక్కర్లను తొలగించారు. కొద్దిసేపటి తర్వాత అక్కడకు చేరుకున్న పోలీస్‌కానిస్టేబుల్‌, పంచాయతీ కార్యదర్శి, సచివాలయ కార్యదర్శులు వారిని ఎంపీడీవో కార్యాలయానికి తరలించారు. వీరిలో ఒకరిది చిత్తూరు, మరొకరిది బాపట్ల, ఇంకో ఇద్దరిది తూ.గోదావరి జిల్లా, విజయవాడకు చెందిన వాళ్లుగా గుర్తించారు.  వైకాపా అభ్యర్థుల తరఫున అనుమతి ఉందని తమను పంపించారనీ, తాము ప్రచారానికి మాత్రమే వచ్చామని యువత చెబుతున్నారు.ఇతర జిల్లాల నుంచి వచ్చిన వారి వద్ద స్టిక్కర్లు లేవని ఎంపీడీవో విజయమ్మ తెలిపారు.ఉన్నతాధికారుల దృష్టికి తీసుకెళ్లి ఇతర జిల్లాల నుంచి వచ్చినవారిని వదిలివేసినట్లు తెలిపారు.