కొడుకు జైలులో.. తల్లిదండ్రులు భిక్షాటన

వంశీధర్‌, ప్రమీల దంపతులు

జయపురం, న్యూస్‌టుడే:  వృద్ధాప్యంలో అండగా ఉంటాడనుక్ను కొడుకు జైలుకు వెళ్లడంతో గత్యంతరం లేక తల్లిదండ్రులు భిక్షాటన చేసుకుంటూ జీవనం సాగిస్తున్నారు. వివరాల్లోకి వెళ్తే... జయపురం సమితి బడకెరంగ పంచాయతీ కొలాబ్‌ నగర్‌ గ్రామానికి చెందిన వంశీధర్‌ బొత్ర, ప్రమీల నియాల్‌కు ఒక్కడే కుమారుడు అతడిని మూడేళ్ల క్రితం పోలీసులు అరెస్టు చేసి విశాఖపట్నం సెంట్రల్‌ జైలుకు తరలించారు. ప్రమీల అంధురాలు కావడం, వంశీధరకు వృద్ధాప్యం కారణంగా గ్రామాల్లో ఎలాంటి పని దొరక లేదు. రేషన్‌ కార్డు లేకపోవడంతో ప్రభుత్వ పథకాలు అందడం లేదు. దీంతో పొట్ట నింపుకొనేందుకు యాచక వృత్తిని ఎంచుకున్నారు. పలుమార్లు సర్పంచ్‌ వద్దకు వెళ్లి రేషన్‌ కార్డు గురించి అడిగామని, కొడుకు ఖైదీ కావడంతో మంజూరు చేసేందుకు నిరాకరించారని వాపోయారు. ప్రభుత్వం తరఫున పింఛను, బియ్యం అందజేసేలా అధికారులు చర్యలు తీసుకోవాలని కోరారు.