దిగి రాకుంటే పరిశ్రమ గేటుకు తాళాలు వేస్తాం

సమావేశంలో మాట్లాడుతున్న దుర్గాప్రసాద్‌. చిత్రంలో అస్లాం, అంగదో తదితరులు

రాయగడ, న్యూస్‌టుడే : కాశీపూర్‌ సమితి దొరాగుడ ఉత్కళ అల్యూమినా పరిశ్రమ వారికి గత నెల 15వ తేదీన 15 డిమాండ్లతో కూడిన వినతిపత్రం అందించినప్పటికీ నేటికీ ఎలాంటి స్పందన రాలేదని డీసీసీ అధ్యక్షుడు దుర్గా ప్రసాద్‌ పండా అన్నారు. ఇప్పటికైనా స్పందించకుంటే ఈ నెల 6న దొరాగుడ పరిశ్రమ ప్రధాన గేటు వద్ద భారీ ఆందోళన చేయడమే కాకుండా, గేట్లకు తాళం వేస్తామని హెచ్చరించారు. బుధవారం  స్థానిక ప్రజా పనులశాఖ ఐబీలో ఏర్పాటు చేసిన విలేకరుల సమావేశంలో ఆయన మాట్లాడారు. పరిశ్రమలో స్థానికులకు ఉద్యోగ, ఉపాధి, నైపుణ్య శిక్షణ వంటివి కల్పించాలని కోరారు. న్యాయం జరగాలని ప్రశ్నించిన ఒండ్రా కంచి గ్రామానికి చెందిన గర్భవతిని పోలీసులు అరెస్టు చేసి చిత్ర హింసలకు గురిచేయడంతో ఆమె మరణించిందని ఆరోపించారు. బాధిత కుటుంబానికి రూ.కోటి నష్టపరిహారం ఇవ్వాలని డిమాండ్‌ చేశారు. స్పందించకుంటే పరిశ్రమకు ముడి సరకు అందకుండా రవాణా స్తంభింపచేస్తామన్నారు. కార్యక్రమంలో కాశీపూర్‌ సమితి పార్టీ అధ్యక్షులు అంగదో నాయక్‌ తదితరులు పాల్గొన్నారు.