నిన్న నువ్వా, నేనా... నేడు నువ్వే నేను

 రొంఢా గ్రామంలో కలసి ప్రచారం చేస్తున్న ప్రదీప్‌, బిభూతి

గోపాలపూర్‌, న్యూస్‌టుడే: ‘మేమిద్దరం ఈసారి సహోదరులం’ చేతులు కలిపిన ఇద్దరం బిజద లెక్క తేలుస్తాం, ప్రజలకు అండగా ఉంటాం. ఈ ప్రాంతాభివృద్ధికి కలసిమెలసి పని చేస్తాం’ అంటూ బ్రహ్మపుర భాజపా లోక్‌సభ అభ్యర్థి ప్రదీప్‌కుమార్‌ పాణిగ్రహి, గోపాల్‌పూర్‌ అసెంబ్లీ బరిలో ఉన్న బిభూతి భూషణ్‌ జెనా ప్రచారం చేస్తున్నారు. గతసారి ఎన్నికల్లో వీరిద్దరూ కత్తులు దూసుకున్నారు. ప్రదీప్‌ బిజద తరఫున, బిభూతి భాజపా అభ్యర్థిగా గోపాల్‌పూర్‌ అసెంబ్లీ స్థానానికి పోటీ చేసిన సంగతి తెలిసిందే. బిభూతి స్వల్ప తేడాతో ఓడిపోయారు. రాజకీయాల్లో శాశ్వత శతృవులు, మిత్రులుండరన్న సత్యానికి నిదర్శనంగా ఈసారి వీరిద్దరూ ఒకే పార్టీ (కమలం) అభ్యర్థులుగా అదృష్టం పరీక్షించుకుంటున్నారు. ప్రచారంలో భాగంగా గ్రామాల్లో పాదయాత్రలు చేసి ఓట్లడుతున్నారు.