చెరువులో చేపల మృత్యువాత

తేలిన చేపలు

శృంగవరపుకోట, న్యూస్‌టుడే: మండలంలోని కిల్తంపాలెం పంచాయతీ జడ్‌.కుమరాం గ్రామ చెరువులో రూ.లక్ష విలువైన చేపలు ఒక్క్కొటిగా చనిపోయాయి. వివరాల్లోకి వెళ్తే.. చెరువును స్థానికుడు యడ్ల నాయుడు మూడు సంవత్సరాలకు లీజుకు తీసుకున్నారు. ఇందులో రూ.లక్ష విలువైన చేప, రొయ్య పిల్లలను వేశారు. ఇప్పుడిప్పుడే చేపలు పెరుగుతుండడంతో తీసి విక్రయించాలని సిద్ధపడుతున్నారు. అయితే గత రెండు రోజులుగా చేపలు చనిపోతుండడంతో ఏం చేయాలో తెలియక ఆందోళనకు గురయ్యారు. శనివారం ఉదయం చెరువులో చేపలన్నీ చనిపోయి తేలిపోయాయి. వీటిలో గడ్డి, రాగండి, బొచ్చ రకాలు ఉన్నాయి. కొద్దిరోజుల్లో రెండు టన్నుల చేపలను తీసి ఒడిశా వ్యాపారులకు విక్రయించాల్సి ఉందని, ఈలోగా ఇలా జరగడంతో తీవ్రంగా నష్టపోయానని బాధితుడు నాయుడు ఆవేదన వ్యక్తం చేస్తున్నారు. ఇదిలా ఉండగా  సమీపంలో ఉన్న గోతుల్లో చేపలు బతికే ఉన్నాయి. ప్రధాన చెరువులో చేపలు చనిపోవడంతో విష ప్రయోగం జరిగిందా అన్న అనుమానాలు వ్యక్తమవుతున్నాయి.