నీకు చేతులెలా వచ్చాయమ్మా?

వంతెన కింద చెత్తలో ఉన్న పసికందు మృతదేహం

అమ్మా.. వెచ్చని నీ పొత్తిళ్లే స్వర్గమనుకున్నానే.. ఈ చీకటి చీల్చుకుని.. నిన్ను చూసే క్షణానికై నిరీక్షించానే.. నీ ప్రేమ పొందేందుకే మరో జన్మ ఎత్తాననుకునే లోపే.. కడతేర్చావే అమ్మా.. నన్ను కనకూడదనుకున్నావా.. అసలు నీకు చేతులెలా వచ్చాయి..

మానవత్వం మంటగలిసిపోతోంది.. కళ్లు తెరవని పసిగుడ్డును దారుణంగా చెత్తలో పడేసిన ఘటన మెంటాడ మండలంలో చోటుచేసుకుంది. ఆండ్ర గ్రామానికి వెళ్లే వంతెన కింద చెత్తలో పసికందు మృతదేహం కనిపించింది. పూర్తిగా నెలలు నిండకుండానే తల్లి దారుణంగా చెత్తలో పడేశారు. దీన్ని సోమవారం గుర్తించిన స్థానికులు పోలీసులకు సమాచారం ఇచ్చారు. ఎస్‌ఐ దేవి పరిశీలించి, మృతదేహాన్ని శవపరీక్షకు పంపించారు. చిన్నారిని రెండు, మూడు రోజుల క్రితం పడేసినట్లు తెలుస్తోందని, కొన్ని భాగాలు పురిటి సంచిలోనే ఉన్నాయని ఎస్‌ఐ చెప్పారు. కేసు నమోదు చేసి, దర్యాప్తు చేస్తున్నట్లు తెలిపారు.

న్యూస్‌టుడే, మెంటాడ (గజపతినగరం)