బ్యాంకు ఖాతాల తనిఖీ

బలిజిపేట: రాష్ట్ర ప్రభుత్వం ప్రతినెలా అందజేసిన సామాజిక పింఛన్ల భృతిని మే, జూన్‌ నెలల్లో బ్యాంకు ఖాతాలలో జమ చేసి నగదును బట్వాడా చేసేందుకు ఎన్నికల కమిషన్‌ ఆదేశాలిచ్చింది. ఇందుకోసం పింఛనుదారులు తమ బ్యాంకు ఖాతాలు ఎలా ఉన్నాయో అనే అంశంపై బ్యాంకు పాసుపుస్తకాలు తీసుకువచ్చి మంగళవారం బలిజిపేట యూనియన్‌ బ్యాంకు శాఖలో తనిఖీ చేయించుకుంటున్నారు. ఈ సందర్భంగా ఈ బ్యాంకు వద్ద పింఛనుదారులతో రద్దీ ఏర్పడింది. పింఛను కోసం అయిదు కిలోమీటర్ల దూరంలో ఉన్న బ్యాంకుకు వెళ్లాల్సి ఉండటంతో పాత విధానంలోనే పింఛను భృతిని అందించాలని పింఛను దారులు అంటున్నారు.