ఎమ్మెల్యే స్వగ్రామంలో జయకృష్ణకు బ్రహ్మరథం

ప్రచారంలో వందలాది మంది ముందు నడుస్తున్న కూటమి అభ్యర్థి నిమ్మక

వీరఘట్టం, న్యూస్‌టుడే: పాలకొండ ఎమ్మెల్యే విశ్వాసరాయి కళావతి(వైకాపా) స్వగ్రామం వండువలో కూటమి అభ్యర్థి నిమ్మక జయకృష్ణకు ప్రజలు బ్రహ్మరథం పట్టారు. మంగళవారం రాత్రి ఎన్నికల ప్రచారానికి వెళ్లిన ఆయనకు గ్రామస్థులు ఘనస్వాగతం పలికారు. ఆలయాలకు తీసుకువెళ్లి దర్శనాలు చేయించారు. తీన్‌మార్‌ మోతలు, యువకుల కేరింతలతో ప్రచారం జోష్‌గా సాగింది. ఇంటింటా మహిళలు ఆయనకు తిలకం దిద్ది హారతులు పట్టారు. ఈ సందర్భంగా ఆయన ఇంటింటికీ వెళ్లి పలకరించారు. ఈ ఎన్నికల్లో మా మద్దతు మీకేనని స్థానికులు ఆయనకు భరోసానిచ్చారు. విజయం సాధించి మళ్లీ తమ గ్రామానికి రావాలని ఆకాంక్షించారు. కార్యక్రమంలో నాయకులు పొదిలాపు కృష్ణమూర్తినాయుడు, ఉదయాన ఉదయభాస్కర్‌, పొన్నాడ నాగేశ్వరరావు, వజ్రగడ రవికుమార్‌ తదితరులు పాల్గొన్నారు.