ఈ రహదారిపై ప్రయాణం చేసేదెట్టా?

బలిజిపేట: మండలంలోని వంతరాం గ్రామం నుంచి గళావల్లి వరకు వెళ్తున్న రహదారి చాలా చోట్ల గుమ్ములు, గోతులతో నిండి పోయింది. పదిహేనేళ్ల కిందట ప్రధానమంత్రి గ్రామీణ సడక్‌ యోజన నిధులతో నిర్మించిన తారురోడ్డుపై నేటివరకు ఎలాంటి మరమ్మతులు చేపట్టనందున పది కిలోమీటర్ల దూరంలో ఉన్న ఈ రహదారిపై 12 చోట్ల పూర్తిగా రాళ్లుతేలాడుతూ గోతులతో దర్శనమిస్తోంది. ఈ మార్గంలో ద్విచక్రవాహనాలు, భారీ వాహనాలు ఈ రోడ్డును దాటేందుకు పలు అవస్థలు పడుతున్నారు. ఈ రహదారిలో తెర్లాం, బలిజిపేట, రాజాం, వంగర మండలాలకు చెందిన 20 గ్రామాల ప్రజలు నిత్యం వెళ్లి వస్తుంటారు. ఈ రోడ్డు అధ్వాన పరిస్థితుల వల్ల ప్రజలకు తీవ్ర అసౌకర్యం కలుగుతుంది. ఈ విషయంపై రోడ్లు, భవనాలశాఖ జేఈ జయరాజును ‘న్యూస్‌టుడే’ వివరణ కోరగా, ఉన్నతాధికారుల దృష్టికి తీసుకువెళ్లి తదుపరి చర్యలు చేపడతామన్నారు.