కూల్చేసిన దర్గా పునఃనిర్మాణం

ముస్లిం మత పెద్దలతో మాట్లాడుతున్న సీఐ శ్రీనివాసరావు

పామూరు, న్యూస్‌టుడే: అధికార పార్టీ నాయకులు కూల్చేసిన పురాతన దర్గాను తిరిగి నిర్మించేందుకు ముస్లిం మత పెద్దలు నిర్ణయించారు. పామూరు పట్టణం సి.ఎస్‌.పురం రహదారిలో... నాలుగు శతాబ్దాల చరిత్ర కలిగిన మౌలా సాహెబ్‌ దర్గాను కొందరు వైకాపా నాయకులు జేసీబీతో సోమవారం కూల్చివేశారు. ఘటనపై ముస్లిం సోదరులు తీవ్ర నిరసన వ్యక్తం చేయడంతో పోలీసులు ఎనిమిది మందిపై కేసు నమోదు చేశారు. ఈ నేపథ్యంలో ఇరువూరు రోడ్డులోని మర్గస్‌ పెద్ద మసీదులో మత పెద్దలు, ముస్లిం సోదరులు మంగళవారం సమావేశమయ్యారు. దర్గాను కూల్చేసిన అధికార పార్టీకి చెందిన ముస్లిం నాయకులు... వారి తరఫున ఓ వ్యక్తిని మధ్యవర్తిగా పంపారు. కూల్చడం తప్పేనని, దర్గా స్థలంతో తమకు ఎలాంటి సంబంధం లేదని అతడి ద్వారా తెలియజేశారు. ఆ మేరకు లిఖిత పూర్వకంగా పెద్దలకు పత్రం అందజేశారు. దీంతో నిర్మాణం ప్రారంభించాలని సమావేశంలో నిర్ణయించారు. రాత్రి... సీఐ కె.శ్రీనివాసరావు పెద్దలతో మాట్లాడారు. అందరూ ఐక్యంగా ఉండాలని సూచించారు. ఎస్సై కె.సురేష్‌ పాల్గొన్నారు.