విధుల నుంచి వాలంటీరు తొలగింపు

అంధుడి పింఛను కాజేయడంపై స్పందించిన అధికారులు

షేక్‌ మస్తాన్‌ బాషాతో మాట్లాడుతున్న ఎంపీడీవో శ్రీనివాసులు

పామూరు: పామూరు-3వ సచివాలయం పరిధిలోని కొత్త నీళ్ల ట్యాంకు వీధిలో నివసిస్తున్న అంధుడు షేక్‌ మస్తాన్‌బాషాకు దివ్యాంగ పింఛను మంజూరైనప్పటికీ వాలంటీర్‌ పి.వెంకటకృష్ణ 23 నెలలుగా ఇవ్వకుండా సొంతానికి వాడుకున్నారు. విషయం బయటకు పొక్కడంతో రూ.69 వేలు నగదును ఈ నెల 2వ తేదీన మస్తాన్‌బాషాకు ఇచ్చారు. ఈ వివరాలను తెలుపుతూ ఈ నెల 3వ తేదిన ‘అంధుడి పింఛను కాజేసిన వాలంటీరు’ శీర్షికన కథనం ప్రచురితమైంది. దీనికి స్పందించిన ఎంపీడీవో వి.శ్రీనివాసులు, ఈవోఆర్డీ వి.బ్రహ్మానందరెడ్డిలు మంగళవారం మస్తాన్‌బాషా ఇంటికి వెళ్లి విచారణ చేశారు. వాలంటీరు పి.వెంకటకృష్ణను విధుల నుంచి తొలగించినట్లు వారు పేర్కొన్నారు. వారి వెంట సంక్షేమ, విద్య సహాయకుడు ఎస్డీ షరీఫ్‌ ఉన్నారు.