ప్రచారంలో నిబంధనలు ఉల్లంఘించొద్దు

మాట్లాడుతున్న కలెక్టర్‌ దినేష్‌కుమార్‌

ఒంగోలు గ్రామీణం, న్యూస్‌టుడే: ఎన్నికల్లో పోటీ చేస్తున్న అభ్యర్థులు తమ ప్రచార ఖర్చుల నిర్వహణ విషయంలో నిబంధనలు ఉల్లంఘించరాదని కలెక్టర్‌ దినేష్‌కుమార్‌ స్పష్టంచేశారు. ఒంగోలు లోక్‌సభ నియోజకవర్గానికి పోటీచేయనున్న అభ్యర్థులతో గురువారం స్థానిక ప్రకాశం భవన్‌లో ఆయన సమావేశం నిర్వహించారు. ఈ సందర్భంగా మాట్లాడుతూ, అభ్యర్థులు ప్రత్యేకంగా కొత్త బ్యాంక్‌ ఖాతాను ప్రారంభించడంతోపాటు, నామినేషన్‌ దాఖలు చేసిన రోజు నుంచి ఆ ఖాతా ద్వారానే ఎన్నికల ఖర్చుల వివరాలు చూపాలన్నారు. ఎన్నికల ప్రచారం కోసం చేస్తున్న ఖర్చులను ఎన్నికల పరిశీలకులు ప్రత్యేకంగా మూడు దఫాలుగా పరిశీలించనున్నట్లు తెలిపారు. ఈ ఖర్చులకు సంబంధించిన రిజిష్టర్లు, బ్యాంక్‌ ఖాతా పుస్తకాలతో ఈ నెల 4, 7, 10 తేదీల్లో కలెక్టరేట్‌లో నిర్వహించే సమావేశానికి హాజరు కావాలని సూచించారు. సమావేశంలో ఎన్నికల పరిశీలకులు అరవింద్‌కుమార్‌ చౌరాసియా, మయూర్‌ కె.మెహతా తదితరులు పాల్గొన్నారు.