కూతపెట్టి... రాష్ట్రస్థాయిలో రాణించి..

ద్వితీయస్థానం సాధించిన జిల్లా బాలికల జట్టు

శ్రీకాకుళం అర్బన్‌, న్యూస్‌టుడే: ప్రకాశం జిల్లా ఒంగోలు వేదికగా జరిగిన రాష్ట్రస్థాయి కబడ్డీ పోటీల్లో జిల్లా బాలికల జట్టు రజత పతకాన్ని దక్కించుకుంది. చిత్తూరు, కర్నూలు, విశాఖపట్నం, ఆతిథ్య ప్రకాశం జట్లపై పైచేయి సాధించి తుది పోరులో కృష్ణా జిల్లా జట్టుతో తలపడింది. హోరాహోరీగా సాగిన తుది పోరులో త్రుటిలో గెలుపు చేజారింది. రెండు దశాబ్దాల తరువాత తొలిసారిగా ఫైనల్‌కు చేరి ద్వితీయస్థానం కైవసం చేసుకున్నట్లు రాష్ట్ర కబడ్డీ అసోసియేషన్‌ ప్రధానకార్యదర్శి వాసిమల్ల వీర్లెంకయ్య తెలిపారు. ఈ సందర్భంగా క్రీడాకారులను జిల్లా అసోసియేషన్‌ అధ్యక్ష, కార్యదర్శులు యార్లగడ్డ వెంకన్నచౌదరి, అక్కెని చిరంజీవిరావు, ఛైర్మన్‌ ధర్మాన కృష్ణ్ణదాస్‌ అభినందించారు.