నిరాడంబరంగా గౌతు శిరీష నామినేషన్‌

ర్యాలీగా వచ్చిన కాంగ్రెస్‌ అభ్యర్థి త్రినాథ బాబు

న్యూస్‌టుడే, పలాస: పలాస నియోజకవర్గ ఎన్నికల నామినేషన్‌ రెండోరోజు కూటమి అభ్యర్థి గౌతు శిరీష నిరాడంబరంగా వేయగా, కాంగ్రెస్‌ అభ్యర్థి మజ్జి త్రినాథ్‌ బాబు ర్యాలీగా వచ్చి దాఖలు చేశారు. ఈ సందర్భంగా శిరీష మాట్లాడుతూ.. వేసవి తాపంతో అభిమానులు ఇబ్బంది పడతారన్న ఉద్దేశంతో హడావుడి లేకుండా వచ్చినట్లు చెప్పారు. అంతకు ముందు తెదేపా కార్యాలయంలో సర్వమత ప్రార్థనలు చేయించారు. వేదపండితులు, క్రైస్తవ, ముస్లిం సోదరులు ఆమెను ఆశీర్వదించారు. కాంగ్రెస్‌ పార్టీ అభ్యర్థి త్రినాథ్‌ బాబు పలాస ఆర్టీసీ కాంప్లెక్స్‌ నుంచి ర్యాలీగా తహసీల్దారు కార్యాలయానికి చేరుకున్నారు. కార్యక్రమంలో వైద్యుడు దువ్వాడ జీవితేశ్వరరావు, మజ్జి బాబురావు, కొర్ల హేమారావు చౌదరి, సీతమ్మ, సీపీఐ నాయకులు వెంకరమణ, వేణుగోపాల్‌, సీపీఎం నాయకులు మోహనరావులు పాల్గొన్నారు.