హరితాభివృద్ధికి కృషి అవసరం

కార్యక్రమంలో మాట్లాడుతున్న గవర్నర్‌ ఆర్‌.ఎన్‌.రవి

ఆవడి, న్యూస్‌టుడే: పర్యావరణాన్ని సంరక్షించే బాధ్యత అందరిదని, ప్రైవేటు సంస్థలు మొక్కలు నాటి కాపాడాలని గవర్నర్‌ ఆర్‌.ఎన్‌.రవి సూచించారు. ప్రపంచ పర్యావరణ దినాన్ని పురస్కరించుకుని తిరువళ్ళూరు జిల్లా ఆవడి ట్యాంక్‌ ఫ్యాక్టరీ ప్రాంగణంలో మొక్కలు నాటే కార్యక్రమం శుక్రవారం జరిగింది. ముఖ్య అతిథిగా ఆయన మాట్లాడుతూ.. దేశం అభివృద్ధి చెందాలంటే సైనిక రంగం మిక్కిలి బలంగా ఉండాలన్నారు. మొక్కలు నాటి పెంచడం ఒక్క ప్రభుత్వంతోనే సాధ్యం కాదని... ప్రతి ఒక్కరూ తమ కర్తవ్యంగా భావించాలని పేర్కొన్నారు. అప్పుడే దేశంలో పచ్చదనం అతివేగంగా అభివృద్ధి చెంది భూతాపం నుంచి భూమిని కాపాడుకోగలుగుతామన్నారు. అనంతరం జవానులతో మాట్లాడి వారి సేవలను ప్రశంసించారు. మహిళా కార్మికులకు మాస్టర్‌మైండ్‌ ట్రస్టు తరపున కుట్టు యంత్రాలు అందజేశారు. కార్యక్రమంలో గవర్నర్‌ సతీమణి లక్ష్మి తదితరులు పాల్గొన్నారు.