పోలీసులు స్వతంత్రంగా పనిచేస్తే నిందితులను గంటలో గుర్తిస్తారు

ఆర్బీ ఉదయకుమార్‌

ప్యారిస్‌, న్యూస్‌టుడే: తిరునెల్వేలి కాంగ్రెస్‌ అధ్యక్షుడిది హత్యా లేదా ఆత్మహత్య అని ఇంకా తేలలేదని మాజీ మంత్రి ఆర్బీ ఉదయకుమార్‌ అన్నారు. పోలీసులను స్వతంత్రంగా పనిచేయనిస్తే నిందితులను గంటలో గుర్తిస్తారని చెప్పారు. మదురైలో మంగళవారం ఆయన విలేకరులతో మాట్లాడారు. డీఎంకే ప్రభుత్వం మూడేళ్లు పూర్తి చేసుకుని నాలుగో ఏడాదిలోకి అడుగుపెట్టిందన్నారు. మూడేళ్లలో జనం విద్యుత్తు ఛార్జీల పెంపు, ఆస్తి పన్ను, పాలు, నిత్యావసర వస్తువుల పెరుగుదల అని 30 ఏళ్ల భారం మోస్తున్నారన్నారు. రాష్ట్రంలో శాంతి భద్రతల పరిరక్షణ ప్రశ్నార్థకం అయిందన్నారు. అత్యధిక అప్పులు ఉన్న రాష్ట్రంగా తమిళనాడు మొదటిస్థానంలో ఉందన్నారు. అధికారంలోకి వస్తే విద్యుత్తు చార్జీలు పెంచమని చెప్పారని ప్రస్తుతం పరిస్థితి అందుకు భిన్నంగా ఉందన్నారు. నీట్‌ పరీక్ష, విద్యారుణం రద్దు కూడా అదే కోవలోకి చేరుతాయన్నారు. రూ.1000 ఇంకా కోటి మందికిపైగా అందాల్సి ఉందని గుర్తు చేశారు. డీఎంకే ప్రభుత్వం ప్రజలకు మోసాన్ని బహుమతిగా ఇచ్చిందన్నారు. వారిని నమ్మేందుకు జనం సిద్ధంగా లేరన్నారు. ఎడప్పాడి పాలన కోసం ఎదురు చూస్తున్నారన్నారని చెప్పారు.