బాలుడి నుంచి 16 కిలోల గంజాయి స్వాధీనం

రైల్వేస్టేషన్‌, న్యూస్‌టుడే: విశాఖ మీదుగా గంజాయిని అక్రమంగా రవాణా చేసేందుకు యత్నించిన ఓ బాలుడ్ని విశాఖ రైల్వే పోలీసులు అదుపులోకి తీసుకున్నారని జీఆర్పీ సీఐ ధనుంజయనాయుడు తెలిపారు. ఎన్నికల విధుల్లో భాగంగా స్టేషన్‌లో తనిఖీలు చేస్తున్న సమయంలో ఒడిశా రాష్ట్రం గంజాం జిల్లాకు చెందిన బాలుడు అనుమానాస్పదంగా తిరుగుతుండగా  అదుపులోకి తీసుకుని విచారించామన్నారు. అతని వద్ద 16 కిలోల గంజాయిని గుర్తించి స్వాధీనం చేసుకున్నట్లు తెలిపారు. బాలుడ్ని జువైనల్‌ హోమ్‌కు తరలించామన్నారు. ఎన్నికల నేపథ్యంలో విశాఖ, అనకాపల్లి, దువ్వాడ, సింహాచలం స్టేషన్లలో ప్రత్యేక బృందాలు గస్తీని ముమ్మరం చేశాయని పేర్కొన్నారు.