మోసయ్యపేటలో వైకాపా దౌర్జన్యకాండ

వైకాపా, కూటమి నాయకుల తోపులాట
అచ్యుతాపురం, న్యూస్‌టుడే: అచ్యుతాపురంలోని మోసయ్యపేట పోలింగ్‌ కేంద్రంలో వైకాపా నాయకులు, కార్యకర్తలు కూటమి నాయకులపై దౌర్జన్యానికి దిగారు. ఓటు వేయడానికి బంధువైన వృద్ధుడిని తీసుకెళ్తున్న చిట్టిబాబు అనే యువకుడిని పోలింగ్‌ కేంద్రంలోకి రాకుండా వైకాపా ఏజెంట్లు అభ్యంతరం చెప్పారు. దీనిపై కూటమికి చెందిన ఏజెంట్లు మీరు తీసుకొస్తే న్యాయమా? మేం తీసుకొస్తే అన్యాయమా? అని ప్రశ్నించారు. దీంతో పోలింగ్‌ వీరి మధ్య మాటల యుద్ధం జరిగింది. ఈ సమాచారం కేంద్రం వెలుపల ఉన్న వైకాపా నాయకులకు అందించడంతో వారంతా ఒకేసారి వచ్చి కూటమి నాయకులపై దాడికి దిగారు. పోలింగ్‌ కేంద్రంలో ఇటుకలను ఒకరిపై ఒకరు విసురుకొని భౌతికదాడులకు దిగారు. అందరూ చూస్తుండగా కొట్టుకుంటూ పోలింగ్‌ బూత్‌ నుంచి వైకాపా నాయకులు బయటకు వచ్చారు. ఈ కొట్లాటలో కూటమికి చెందిన పుర్రే రాజు చెయ్యి విరిగిపోయింది. ఈ ఘటనతో ఓటర్లు పరుగులు తీశారు. సమస్యాత్మక గ్రామమైనా ఒకే ఒక కానిస్టేబుల్‌ను బందోబస్తుకు ఉంచారని, గట్టి చర్యలు తీసుకోవడంలో పోలీసులు విఫలమయ్యారని కూటమి నాయకులు పుర్రే శ్రీను మండిపడ్డారు. ఓడిపోతామనే భయంతో వైకాపా నాయకులు కొట్లాటకు దిగారని ఆయన ఆరోపించారు.