డిమాండున్న పంటల సాగును ప్రోత్సహించండి

విజయనగరం అర్బన్‌, న్యూస్‌టుడే: పంటలకు గిట్టుబాటు ధర లభించేలా సహకారం అందించాలని రాష్ట్ర వ్యవసాయశాఖ కమిషనర్‌ అరుణ్‌కుమార్‌ ఆదేశించారు. జిల్లాలో పర్యటించిన ఆయన శుక్రవారం సంయుక్త కలెక్టర్‌ ఛాంబర్లో అధికారులతో సమావేశమయ్యారు. ప్రజలు ఎక్కువగా వినియోగించే, మార్కెట్‌లో డిమాండ్‌ ఉన్న ఆహార పంటలనే పండించేలా రైతులను ప్రోత్సహించాలని సూచించారు. సాగు, విత్తనాల సరఫరా, ధాన్యం కొనుగోలు, బిల్లుల చెల్లింపు, బీమా పరిహారం అందజేత తదితర అంశాలపై చర్చించారు. గత సీజన్‌లో జరిగిన ధాన్యం కొనుగోలు ప్రక్రియకు సంబంధించిన రవాణా భత్యం బిల్లులను త్వరితగతిన చెల్లించాలని పౌర సరఫరాల శాఖ డీఎం మీనాకుమారిని ఆదేశించారు. ఎండీయూ వాహన చోదకులకు ప్రమాద బీమా వర్తించేలా చర్యలు తీసుకోవాలని, ఇప్పటికే ఎవరైనా మరణించి ఉంటే వివరాలు పంపించాలన్నారు. సంయుక్త కలెక్టర్‌ కె.మయూర్‌ అశోక్‌, వ్యవసాయ అధికారి రామారావు, పౌర సరఫరాల అధికారి మధుసూదనరావు, సహకార అధికారి రమేష్‌, వ్యవసాయ పరిశోధన కేంద్రం శాస్త్రవేత్తలు పాల్గొన్నారు.