కళాకారుల అరెస్టు

హయత్‌నగర్‌, న్యూస్‌టుడే: ముఖ్యమంత్రి కేసీఆర్‌ను, ప్రభుత్వ పథకాలను కించపరిచేలా ప్రదర్శించిన నాటకంలో నటించిన ఇద్దరు కళాకారులను నగరంలోని హయత్‌నగర్‌ పోలీసులు మంగళవారం అరెస్టు చేశారు. సూర్యాపేట జిల్లా, నూతనకల్‌ మండలం, మిర్యాల గ్రామానికి చెందిన కొమ్ము శ్రీరాములు, వరంగల్‌ జిల్లా ఖిలా వరంగల్‌ మండల పరిధిలోని దూపకుంటకు చెందిన బరుపట్ల రాజు(అలియాస్‌ రవి) జూన్‌ 2న రాష్ట్ర ఆవిర్భావ దినోత్సవం పురస్కరించుకొని భాజపా ఆధ్వర్యంలో నిర్వహించిన నాటకంలో సీఎంను కించపరిచేలా వేషధారణలో నటించారు. దీనిపై నమోదైన కేసులో ఇప్పటికే పార్టీ నేత జిట్టా బాలకృష్ణారెడ్డిని అరెస్టు చేయగా తాజాగా నాటకంలో కీలక పాత్రధారులైన శ్రీరాములు, రవిని వారి స్వగ్రామాల్లో అదుపులోకి తీసుకున్నారు. న్యాయస్థానంలో హాజరుపరుచగా ఇద్దరికి రిమాండ్‌ విధించినట్లు హయత్‌నగర్‌ సీఐ వెంకటేశ్వర్లు తెలిపారు.