దుకాణాల్లో అధికారుల తనిఖీలు.. కేసుల నమోదు

కాశీబుగ్గ, న్యూస్‌టుడే: వరంగల్‌, హనుమకొండ జిల్లాల పరిధిలో పలు దుకాణాల్లో మంగళవారం జిల్లా ఇన్‌స్పెక్టర్‌ బి.ప్రవీణ్‌కుమార్‌ ఆధ్వర్యంలో తూనికలు, కొలతల అధికారులు తనిఖీలు చేపట్టి.. 7 కేసులు నమోదు చేశారు. హనుమకొండలో ఎలక్ట్రికల్‌, హార్డ్‌వేర్‌ దుకాణాల్లో తనిఖీలు చేయగా.. ఎమ్మార్పీ ధరలు, కంపెనీ చిరునామా సరిగాలేని పొరపాట్లను గుర్తించి నలుగురిపై కేసులు నమోదు చేశారు. వరంగల్‌ తూర్పులో పలు చరవాణి దుకాణాల్లో తనిఖీలు చేశారు. ఈ విషయం తెలిసి కొందరు షాపులను మూసేసి వెళ్లిపోయారు. వరంగల్‌లో నిబంధనలు పాటించని మూడు దుకాణాలపై కేసులు నమోదు చేశామని, పలువురికి నోటీసులు జారీ చేసినట్లు జిల్లా ఇన్‌స్పెక్టర్‌ ప్రవీణ్‌కుమార్‌ తెలిపారు.