నేటి నుంచి షర్మిల ఎన్నికల ప్రచారం

ఈనాడు, కడప: పీసీసీ అధ్యక్షురాలు, కాంగ్రెస్‌ పార్టీ కడప ఎంపీ అభ్యర్థి వైఎస్‌ షర్మిల రెండో విడత ఎన్నికల ప్రచారాన్ని బుధవారం నుంచి శ్రీకారం చుట్టనున్నారు. తమ కుటుంబ పెద్దదిక్కు వివేకా హత్యలో ఐదేళ్లుగా న్యాయం జరగకపోవడానికి నిరసనగా షర్మిల ప్రజాకోర్టులో తేల్చుకోవడానికి రంగంలోకి దిగారు. వైకాపా నుంచి అవినాష్‌రెడ్డి, కాంగ్రెస్‌ నుంచి షర్మిల, తెదేపా నుంచి భూపేష్‌రెడ్డి తలపడుతున్నారు. ప్రచార రంగంలోకి వైకాపా నుంచి సీఎం జగన్‌ సతీమణి భారతి దిగగా.. రెండో విడత ప్రచారానికి షర్మిల, సునీత దిగనుండడం అత్యంత ఆసక్తి నెలకొంది. బద్వేలు నియోజకవర్గం కాశినాయన, కలసపాడు, పోరుమామిళ్ల, బి.కోడూరు, బద్వేలు, అట్లూరు మండలాల్లో బుధవారం పర్యటించనున్నారు. ఉదయం 9.30 గంటలకు కాశినాయన మండలం వడ్డమాను గ్రామం నుంచి ప్రచారం ప్రారంభించనున్నారు. పోలింగ్‌ వరకు జిల్లాలోనే షర్మిల మకాం వేస్తారని పార్టీ వర్గాలు తెలిపాయి.