దిల్లీ: కేంద్ర దర్యాప్తు సంస్థలైన ఈడీ, సీబీఐలను మోదీ సర్కార్‌ తమపై ప్రయోగిస్తోందని ప్రతిపక్షాలు చేస్తున్న ఆరోపణలపై న్యాయశాఖ మంత్రి అర్జున్‌ రామ్‌ మేఘ్వాల్‌ (Arjun ram meghwal) స్పందించారు. వీటిని కాంగ్రెస్‌ హయాంలోనే ప్రవేశపెట్టినట్లు గుర్తు చేసిన ఆయన ఆ పార్టీపై విమర్శలు గుప్పించారు. ఇటీవల ప్రవేశపెట్టిన భారతీయ న్యాయసంహిత చట్టాలపై నిర్వహించిన సమావేశంలో పాల్గొన్న మేఘ్వాల్‌ ఈ వ్యాఖ్యలు చేశారు. 

‘‘కేంద్ర దర్యాప్తు సంస్థలను తమపై ప్రయోగిస్తోందంటూ భాజపాపై ప్రతిపక్షాలు ఆరోపించడం నాకు ఆశ్చర్యాన్ని కలిగిస్తోంది. నిజానికి మీరు (కాంగ్రెస్‌ను ఉద్దేశిస్తూ) అధికారంలో ఉన్నప్పుడే వీటి ఏర్పాటు జరిగింది కదా. అప్పటినుంచే అవి పనిచేస్తున్నాయి. దీనిపై మీరు ఎందుకు చింతిస్తున్నారు. చట్టం ప్రకారమే చర్యలు అమలవుతాయి. కేంద్రంపై ప్రతిపక్షాలు చేస్తున్న ఈ అసత్య ప్రచారాలు ఎన్నికల వేళ చర్చనీయాంశంగా మారుతున్నాయి’’ అని మేఘ్వాల్‌ కాంగ్రెస్‌కు కౌంటర్ ఇచ్చారు. 

ఐదేళ్లకు ఒకసారి దేశం కోసం ఐదు నిమిషాలు: ఓటు హక్కుపై జస్టిస్ డీవై చంద్రచూడ్

నూతన క్రిమినల్‌ చట్టాలపై ఏర్పాటుచేసిన ఈ సమావేశంలో సుప్రీంకోర్టు ప్రధాన న్యాయమూర్తి డీవై చంద్రచూడ్‌ సహా పలువురు న్యాయమూర్తులు, ప్రభుత్వ ఉన్నతాధికారులు పాల్గొన్నారు. వీరితో పాటు ఈడీ చీఫ్‌ రాహుల్‌ నవీన్‌, సీబీఐ డైరెక్టర్‌ ప్రవీణ్ సూద్ హాజరయ్యారు.