ప్రధానికి ఖర్గే లేఖ

దిల్లీ: కాంగ్రెస్‌పై తీవ్ర విమర్శలు చేస్తున్న భాజపా సభల్లో వినిపించే చప్పట్లకు మోసపోవద్దని ప్రధాని మోదీని కోరుతూ కాంగ్రెస్‌ అధ్యక్షుడు మల్లికార్జున ఖర్గే గురువారం రెండు పేజీల లేఖ రాశారు. ‘‘ఇటీవలి సభల్లో మీ (మోదీ) భాష విని నేనేమీ ఆశ్చర్యపోలేదు. మొదటిదశ పోలింగు చూశాక మీ పరిస్థితిని అర్థం చేసుకోగలను. ఆ ప్రసంగాలకు మీ సొంత వ్యక్తులు కొట్టే చప్పట్లు చూసి మోసపోకండి. మీ మాటలతో నిరాశకు గురైన కోట్లాదిమంది ప్రజల అభిప్రాయాలను వారు మీదాకా రానివ్వడం లేదు. మా మ్యానిఫెస్టోలో చేర్చని అంశాల గురించి సలహాదారులు మీకు తప్పుడు సమాచారం ఇస్తున్నారు. ప్రస్తుతం మీరు మంగళసూత్రం గురించి మాట్లాడుతున్నారు. మణిపుర్‌లో మహిళలపై అకృత్యాలకు మీ ప్రభుత్వం కారణం కాదా? మీ హయాంలో రైతులు ఆత్మహత్యలు చేసుకొంటుంటే వారి భార్యాపిల్లల్ని రక్షిస్తున్నారా? మీరు ప్రధాని పదవి ప్రతిష్ఠ దిగజారేలా, వర్గాల మధ్య చిచ్చు పెట్టేలా మాట్లాడుతున్నారు. మా న్యాయపత్రాన్ని వివరించేందుకు మీతో వ్యక్తిగత భేటీకి సమయమిస్తే సంతోషిస్తాను’’ అని ఖర్గే లేఖ ముగించారు. దీన్ని ‘ఎక్స్‌’లో షేర్‌ చేశారు.