దిల్లీ: గాంధీ కుటుంబానికి కంచుకోటల్లాంటి అమేఠీ, రాయ్‌బరేలీ స్థానాల్లో కాంగ్రెస్‌ తరఫున ఎవరు పోటీ చేస్తారన్న ఉత్కంఠకు తెరపడింది. అయితే ఈ రెండు సీట్లలో ఎక్కడా పార్టీ అగ్రనేత ప్రియాంకాగాంధీ వాద్రా బరిలో నిలవకపోవడం ప్రస్తుతం చర్చనీయాంశమైంది. దీనిపై రకరకాల విశ్లేషణలు వినిపిస్తున్నాయి. సోనియాగాంధీ ఇప్పటికే రాజ్యసభ ఎంపీగా ఉన్నారు. రాహుల్‌ సార్వత్రిక ఎన్నికల బరిలో దిగారు. ప్రియాంక కూడా పోటీ చేసి, అన్నాచెల్లెళ్లు ఇద్దరూ గెలిస్తే.. ఒకే కుటుంబానికి చెందిన ముగ్గురు వ్యక్తులు పార్లమెంటులో ఉన్నట్లవుతుంది. దాంతో కాంగ్రెస్‌ కుటుంబ పార్టీ అని విమర్శలు గుప్పించేందుకు భాజపాకు మరో అవకాశం ఇచ్చినట్లవుతుందని పార్టీ భావించినట్లు పలువురు చెబుతున్నారు. పోటీకి ప్రియాంక దూరంగా ఉండేందుకు ఇదో కారణమని వివరిస్తున్నారు.