దిల్లీ: రాజ్యాంగ మార్పుపై కొంతకాలంగా భాజపా- కాంగ్రెస్‌ల నడుమ మాటల యుద్ధం జరుగుతోంది. దీనిపై కాంగ్రెస్‌ అగ్రనేత రాహుల్‌ గాంధీ (Rahul Gandhi) మరోసారి స్పందించారు. కేంద్రమంత్రి అమిత్‌ షాపై విమర్శలు గుప్పించారు. మన రాజ్యాంగాన్ని మార్చే శక్తి ఈ ప్రపంచంలోనే ఎవరికీ లేదంటూ మండిపడ్డారు.

‘‘భాజపా మరోసారి అధికారంలోకి వస్తే రాజ్యాంగాన్ని మారుస్తుందని ఆయా సందర్భాల్లో ఆ పార్టీ నేతలు స్పష్టంగా చెబుతున్నారు. ఈవిషయాన్ని అమిత్‌ షా కూడా చెప్పారు’’ అని రాహుల్‌ ఆరోపించారు. ‘‘బి.ఆర్‌. అంబేడ్కర్‌ కాంగ్రెస్‌, దేశ ప్రజలతో కలిసి బ్రిటిష్‌ వారితో పోరాడి భారత రాజ్యాంగాన్ని రూపొందించారు. ఇది పేద ప్రజల ఆత్మ, గొంతుక వంటిది.  దాన్ని ఎవరూ తాకలేరు. మార్చే శక్తి ప్రపంచంలో ఎవరికీ లేదు. అలాంటిది రాజ్యాంగ మార్పుకై కేంద్రంలోని భాజపా కలలు కంటోంది. అలా ఎన్నటికీ జరగనివ్వం’’ అని వ్యాఖ్యానించారు.

‘అసహనంతోనే ఫేక్‌ వీడియోలు’ : కాంగ్రెస్‌పై మండిపడ్డ అమిత్‌ షా

భవిష్యత్తుకు భరోసా ఇస్తోన్న రాజ్యాంగాన్ని మార్చి.. రిజర్వేషన్లను రద్దు చేయాలన్నది భాజపా, ఆర్‌ఎస్‌ఎస్‌ ఉద్దేశమని మరోసారి రాహుల్‌ మండిపడ్డారు. కానీ, ఇప్పుడు తాము రిజర్వేషన్లకు వ్యతిరేకం కాదని ఆ పార్టీ నేతలు అంటున్నారు. అలాంటప్పుడు ప్రభుత్వ రంగాన్ని, రైల్వేలను ప్రైవేటీకరించడం, అగ్నివీర్‌ను ప్రవేశపెట్టడం ఎందుకని ప్రశ్నించారు.