ఇంటర్నెట్‌ డెస్క్‌: దేశంలో ఎన్నికల పండగ కొనసాగుతోంది. ఈ క్రమంలోనే రైడ్‌ షేరింగ్‌ ‘ర్యాపిడో’ ఓటర్ల కోసం ఓ ఆఫర్‌ తీసుకొచ్చింది. పోలింగ్‌ కేంద్రాల వద్దకు ఉచితంగా బైక్‌ రైడ్‌ (Bike Ride) సదుపాయాన్ని కల్పిస్తామని బుధవారం ప్రకటించింది. తమ సేవలను కేవలం కర్ణాటక (Karnataka)లో మాత్రమే అందించేందుకు సిద్ధమైంది. రాష్ట్రంలో ఏప్రిల్‌ 26న పోలింగ్‌ జరగనుంది. ఈ క్రమంలోనే ఓటింగ్ శాతాన్ని పెంచడంలో భాగంగా తమవంతు కృషి చేసేందుకు ప్రయత్నిస్తున్నట్లు ర్యాపిడో ఓ ప్రకటనలో పేర్కొంది.

ఎన్నికల కోసం ఎల్లలు దాటి.. స్వదేశానికి వేల మంది ఎన్నారైలు!

ఇందుకోసం ‘సవారీ జిమ్మదారీకీ’ కార్యక్రమం పేరిట సీనియర్‌ సిటిజన్స్‌, దివ్యాంగులకు మాత్రమే సేవలందించేందుకు సిద్ధమైనట్లు తెలిపింది. బెంగళూరు, మైసూర్‌, మంగళూరులో ఓటు వినియోగించుకునేవారు 'VOTE NOW' కోడ్‌ను వినియోగించి తమ సేవలను పొందాలని కోరింది. పోలింగ్‌ కేంద్రాలకు వెళ్లే క్రమంలో రవాణా విషయంలో ఎటువంటి ఆందోళన చెందకుండా దివ్యాంగులు, సీనియర్‌ సిటిజన్లు తమ సేవలను వినియోగించుకోవాలని ర్యాపిడో సహ వ్యవస్థాపకుడు పవన్‌ గుంటుపల్లి సూచించారు.