దిల్లీ: ఉత్తరప్రదేశ్‌లోని అమేఠీ, రాయ్‌బరేలీలో కాంగ్రెస్‌ (Congress) అభ్యర్థులు ఎవరనే దానిపై ఇంకా ఉత్కంఠ కొనసాగుతోంది. ఎన్నికలు సమీపిస్తున్నా ఇంకా అభ్యర్థులను ప్రకటించకపోవడంతో హస్తం పార్టీపై భాజపా నేత, కేంద్రమంత్రి స్మృతి ఇరానీ (Smriti Irani) విమర్శలు గుప్పించారు. ప్రజల మధ్య విభేదాలు సృష్టించేందుకు కాంగ్రెస్‌ అగ్రనేత రాహుల్‌ గాంధీ (Rahul Gandhi) ప్రయత్నిస్తున్నారంటూ తీవ్ర ఆరోపణలు చేశారు.

‘‘ఇప్పటివరకు అమేఠీలో సమస్యపై దృష్టి పెట్టాం. కానీ, ఇప్పుడు కాంగ్రెస్‌ అభ్యర్థి ఖరారు కోసం ఎదురు చూస్తున్నాం. బాల రాముడి ప్రాణ ప్రతిష్ఠ కార్యక్రమానికై కేంద్రం పంపిన ఆహ్వానాన్ని కాంగ్రెస్‌ తిరస్కరించింది. కానీ, కాంగ్రెస్‌ అగ్రనేతలు రాహుల్‌, ప్రియాంక అయోధ్య పర్యటనకు సిద్ధమవుతున్నారు. పర్యటన పేరుతో కాంగ్రెస్‌ కొత్త నాటకానికి తెర లేపుతోంది. రాముడి పేరును వినియోగించుకుని ఓట్లు అడిగేందుకే ఆ పార్టీ ప్రయత్నిస్తోంది. అందుకే రాహుల్‌ ఈ పర్యటనకు సిద్ధమయ్యారు’’ అని విమర్శలు గుప్పించారు.

రెచ్చిపోయిన మిలిటెంట్లు.. సీఆర్పీఎఫ్‌ శిబిరంపై 2 గంటల పాటు కాల్పుల వర్షం

కాంగ్రెస్‌ కంచుకోటలుగా పేరొందిన రాయ్‌బరేలీ, అమేఠీ సహా పలు లోక్‌సభ స్థానాల్లో అభ్యర్థులను నేడు ఖరారు చేసే అవకాశాలున్నాయి. పార్టీ జాతీయాధ్యక్షుడు మల్లికార్జున ఖర్గే అధ్యక్షతన కాంగ్రెస్‌ కేంద్ర ఎన్నికల కమిటీ దిల్లీలో భేటీ కానుంది. ఐదో విడతలో భాగంగా అమేఠీలో మే 20న పోలింగ్‌ జరగనుంది. ఈ నియోజకవర్గానికి గత 15 ఏళ్లు ప్రాతినిధ్యం వహించిన రాహుల్‌.. 2019 ఎన్నికల్లో స్మృతి చేతిలో ఓటమి పాలైన విషయం తెలిసిందే.