12ఏళ్ల తర్వాత ఆ మొక్క మళ్లీ  పూసింది!

భోపాల్‌: నీల్‌కురంజి పుష్పాలు మరోసారి వికసించాయి. సాధారణంగా 12 ఏళ్లకు ఒకసారి పుష్పించే ఈ పువ్వులు తాజాగా మధ్యప్రదేశ్‌లోని పచ్‌మరి ప్రాంతంలో దర్శనమిచ్చాయి. చివరిసారిగా 2006లో కేరళలోని మన్నార్‌ ప్రాంతంలో వికసించిన నీల్‌కురంజి ఈసారి కాస్తా ఆలస్యంగా పుష్పించాయి. ఈ అందాలను వీక్షించేందుకు ప్రపంచ వ్యాప్తంగా ఎంతో మంది పర్యటకులు వస్తుంటారు. కేరళ, మధ్యప్రదేశ్‌లోనే కాకుండా తమిళనాడులోని కొడైకెనాల్‌ తదితర ప్రాంతాల్లోనూ ఈ పుష్పాలు కనిపిస్తుంటాయి.

ఏంటీ నీల్‌కురంజి

ఇది ఓ గడ్డిజాతికి చెందిన పువ్వు. గుబురుగా పెరిగే మొక్క పూలు పూస్తుంది. పేరుకు తగ్గట్టే నీలి రంగులో ఉండే ఈ పువ్వు.. దక్షిణభారత దేశంలోని పశ్చిమ కనుమల్లో ఎక్కువగా కనిపిస్తుంది. దీనిని మొదటిసారిగి 1838 సంవత్సరంలో గుర్తించారు. అప్పటి నుంచి పుష్కరానికోసారి పూస్తున్నట్లు గుర్తించారు. పువ్వులు పూసిన తర్వాత వాటి విత్తనాలు ఆ ప్రాంతమంతా వెదజల్లినట్లుగా విస్తరిస్తాయి. తర్వాత కొన్ని రోజులకు ఆ మొక్కలు చనిపోతాయి. ఆ తర్వాత మళ్లీ 12 ఏళ్లకు ఈ విత్తనాలు మొక్కలుగా మారి పుష్పిస్తాయి. ఈ పువ్వులు పూసిన ప్రాంతమంతా నీలిరంగులో కనువిందు చేస్తుంది.

ఔషధ గుణాలూ ఎక్కువే
ఈ పువ్వుకు అద్భుతమైన ఔషధ గుణాలున్నాయని పలువురు చెబుతుంటారు. అనేక మొండి వ్యాధులను నయం చేసే శక్తి ఈ పుష్పాలకు ఉంటుందని ఆయుర్వేదంలోనూ ఉందట. అందుకే 12 ఏళ్లపాటు ఓపిగ్గా నిరీక్షించి, ఆ పూలు పూయగానే వాటిని సేకరించి ఔషధాలు తయారు చేస్తారు. సరైన మోతాదులో ఉపయోగిస్తే నీల్‌కురంజి నయం చేయలేని రోగమంటూ లేదని ఆయుర్వేద నిపుణులు అభిప్రాయపడుతున్నారు. అయితే ఈ పుష్పంలో ఏ భాగాన్ని ఉపయోగించాలో తెలిసే గ్రంథాలన్నీ బ్రిటిష్‌ వారి హయాంలో నాశనం అయిపోయాయని చెబుతున్నారు.

ఏకంగా గుడి కట్టారు.
ఇది చాలా అరుదైన పుష్పం కావడం వల్ల దీంతో తయారైన ఔషధాలు అత్యంత ఖరీదైనవి. అప్పట్లోనే దీని ప్రాశస్థ్యాన్ని తెలుసుకున్న ఓ యూరోపియన్‌ మహిళ నీల్‌కురంజి పేరిట ఓ ఆలయాన్ని నిర్మించి, ఆమె కూడా హిందూమతాన్ని స్వీకరించారట.