భద్రగిరి..ఇల ‘వైకుంఠ’పురి 

భద్రాచలం : సూర్యుడు ఉత్తరాయణానికి మారే ముందు వచ్చే శుద్ధ ఏకాదశినే వైకుంఠ ఏకాదశి లేదా ముక్కోటి ఏకాదశి అంటారు. ఈ ఏకాదశి వేళ గరుడ వాహనం అధిరోహించి శ్రీ మహావిష్ణువు భువికి వస్తాడని భక్తుల నమ్మకం. మూడు కోట్ల ఏకాదశులతో సమానంగా భావించే ముక్కోటి ఏకాదశి ఉత్సవాలు భద్రాచలంలోని శ్రీ సీతారామచంద్ర స్వామి ఆలయంలో వైభవంగా జరుగుతున్నాయి. ఈ ఉత్సవాల్లో భాగంగా ఆ భద్రాద్రి భక్తాద్రిగా మారగా... ఆ రామచంద్రుడు మూడోరోజు వరాహ అవతారంలో భక్తులకు దర్శనమిచ్చారు. బేడా మండపంలో స్వామివారిని అలంకరించిన అర్చకులు అభిషేకాలు చేశారు. ప్రత్యేక పూజలు నిర్వహించారు. రామయ్య దర్శనం కోసం పెద్దసంఖ్యలో తరలివచ్చిన భక్తులకు ఎలాంటి ఇబ్బందులు కలగకుండా నిర్వాహకులు అన్ని ఏర్పాట్లు చేశారు.