Andhra News: శ్రీశైలం మార్గంలో పెద్దపులి హల్‌ చల్‌.. సెల్‌పోన్లలో చిత్రీకరించిన యాత్రీకులు

దోర్నాల: శ్రీశైలం నల్లమల అడవిలో పెద్దపులి పగటిపూట రహదారిపై హల్‌ చల్‌ చేసింది. ప్రకాశం జిల్లా దోర్నాల మండలం చింతల - తుమ్మలబైలు ఘాట్‌ రోడ్‌లో ఇవాళ ఉదయం పెద్దపులి రోడ్డు దాటుతూ వాహనదారులకు కనిపించింది. పులిని చూసిన వాహనదారులు ఒక్కసారిగా భయాందోళనకు గురయ్యారు. వాహనాలను చూసిన పులి భయంతో రోడ్డుపై కొంతదూరం పరుగెత్తి అడవిలోకి వెళ్లిపోయింది. దోర్నాల నుంచి శ్రీశైలం వైపు వెళ్తున్న యాత్రికులు ఈ దృశ్యాలను సెల్‌ఫోన్‌లలో బంధించారు. శీతాకాలం కావడంతో పెద్దపులి రోడ్డుపైకి వస్తుందని స్థానికులు చెబుతున్నారు. గతేడాది ఇదే సీజన్లో పెద్దపులి శ్రీశైలం సమీపంలోని సాక్షిగణపతి ఆలయం వద్ద యాత్రికులకు కనిపించింది. పెద్ద పులులు తరచు కనిపించడం నల్లమలలో పులుల సంఖ్య పెరుగుతుందన్న వాదనకు బలం చేకూరుస్తోంది.