E-Mobility: టేబుల్ మీద తింటూ.. టేబుల్‌తో సహా ప్రయాణించి..!

ముంబయి: ప్రముఖ వ్యాపారవేత్త ఆనంద్‌ మహీంద్రా షేర్ చేసే వీడియోల్లో హాస్యం ఎంతుంటుందో.. మెదడుకు పనిచెప్పే విషయమూ అంతే ఉంటుంది. తాజాగా ఆయన పంచుకున్న వీడియో కూడా అంతే నవ్వులు పూయిస్తోంది. అలాగే సరికొత్త సాంకేతికత గురించి తెలియజేసేలా ఉంది. 

ఆ వీడియోలో నలుగురు వ్యక్తులు ఒక టేబుల్ చుట్టూ కూర్చొని తమకిష్టమైన ఆహారాన్ని ఆరగిస్తున్నారు. అయితే ఆ టేబుల్ ఉంది రెస్టారెంట్‌లో కాదు.. గ్యాస్‌ స్టేషన్ వద్ద. వారు ఒకవైపు నచ్చింది తింటూ.. ఆ టేబుల్‌తో సహా గ్యాస్‌ స్టేషన్‌కు వచ్చి, ఇంధనం నింపుకొన్నారు. తర్వాత వారిలో ఒకరు ఆ మొబైల్ టేబుల్‌ను స్టార్ట్ చేయడంతో.. దాంతో సహా వారు చేరుకోవాల్సిన ప్రదేశానికి వెళ్లిపోయారు. తింటూనే వారు ప్రయాణించారు. ఈ వీడియో మహీంద్రాను అబ్బురపరిచింది. ‘దీనినే ఇ-మొబిలిటీ(e-mobility) అంటారనుకుంటున్నాను. ఇక్కడ ఇ అంటే ఆరగించడం’ అని చమత్కరించారు. ఈ వీడియోను నెట్టింట్లో షేర్ చేయగా.. నెటిజన్లు కామెంట్ల వర్షం కురిపించారు.