CM Jagan: అందుకే ఈ రెండు పథకాలకు ‘చదువు’ నిబంధన: సీఎం జగన్‌

అమరావతి: పేదరికం పోవాలంటే చదువు అనే ఓ దివ్యాస్త్రం అందరికీ అందుబాటులోకి రావాలని ఏపీ ముఖ్యమంత్రి వైఎస్ జగన్ అన్నారు. రాష్ట్రంలోని పేదల పిల్లలు బాగా చదువుకునేలా ప్రభుత్వం అన్ని చర్యలు తీసుకుంటోందని సీఎం తెలిపారు. వైఎస్‌ఆర్‌ కళ్యాణమస్తు, షాదీ తోఫా పథకాల నిధులను తాడేపల్లిలోని క్యాంపు కార్యాలయంలో సీఎం బటన్‌ నొక్కి విడుదల చేశారు. జనవరి-మార్చి త్రైమాసికంలో వివాహం చేసుకుని, అర్హత పొందిన వారికి ఆర్థిక సాయం విడుదల చేశారు. 12,132 మంది లబ్ధిదారులకు రూ.87.32 కోట్లను వారి ఖాతాల్లో జమ చేశారు.

నిధుల విడుదల అనంతరం సీఎం మాట్లాడుతూ.. పేదలు తమ పిల్లలను కనీసం పదో తరగతి వరకైనా చదివిస్తారనే ఆలోచనతోనే వైఎస్‌ఆర్‌ కళ్యాణమస్తు, షాదీ తోఫా పథకాలకు చదువు నిబంధన పెట్టామని ఈ సందర్భంగా చెప్పారు. ఉన్నత చదువులు చదివేందుకు జగనన్న విద్యాదీవెన, వసతి దీవెన అమలు చేస్తూ డిగ్రీ వరకు చదువుకునేలా సదుపాయం కల్పించినట్లు తెలిపారు. సాయం పొందిన 12,132 జంటల్లో 5,929 జంటలు జగనన్న విద్యా దీవెన, వసతి దీవెన పొందుతున్నట్లు సీఎం తెలిపారు. ప్రతి పేద కుటుంబం పేదరికం నుంచి బయటకు రావాలని, ఎస్సీ, ఎస్టీ, బీసీ, మైనార్టీలకు మంచి జరగాలనే ప్రభుత్వం అడుగులు వేస్తున్నట్లు సీఎం తెలిపారు.