పాలమూరు ఎత్తిపోతలపై రెండో రోజు సమీక్ష

హైదరాబాద్‌: పాలమూరు-రంగారెడ్డి ఎత్తిపోతల పథకంపై సీఎం కేసీఆర్‌ రెండోరోజూ సమీక్షించారు. పాలమూరు ఎత్తిపోతల ప్రాజెక్ట్‌ పనులను వేగవంతం చేయాలని సీఎం ఆదేశించారు. కల్వకుర్తి, పాలమూరు ఎత్తిపోతల పథకాల విస్తరణకు ప్రణాళికలు సిద్ధం చేయాలని అధికారులను ఆదేశించారు. తాండూరు, వికారాబాద్‌ ప్రాంతాలకు గ్రావిటీ ద్వారా సాగునీరు ఇవ్వాలని సూచించారు. కల్వకుర్తి లిఫ్ట్‌ ఆయకట్టును పూర్తిగా స్థిరీకరించాలన్నారు. కర్ణాటక సరిహద్దు గ్రామాల భూములకు సాగునీరు ఇవ్వాలన్నారు. కాల్వలు, వాగుల ద్వారా నీటిని తీసుకెళ్లేందుకు చెక్‌ డ్యాములు పటిష్ఠం చేయాలని,   పాలమూరుపై పూర్తిగా దృష్టిసారించాలని అధికారులను ఆదేశించారు. అచ్చంపేట ఎత్తిపోతల పథకం సర్వే పనులు త్వరగా పూర్తిచేయాలని, పనుల అంచనాలను పరిపాలనా అనుమతుల కోసం పంపాలన్నారు. బల్మూరు, లింగాల, అమ్రాబాద్‌ ప్రాంతంలో 60 వేల ఎకరాలకు సాగునీరందించాలన్నారు. ఏదుల రిజర్వాయర్‌ నుంచి 22 కి.మీ కాల్వ తీసి, లింగాల వద్ద లిఫ్ట్‌ నిర్మించాలని సీఎం ఆదేశించారు. మైలారం వద్ద 3 టీఎంసీల సామర్థ్యంతో రిజర్వాయర్‌,  మున్ననూరులో 1.4 టీఎంసీల సామర్థ్యంతో రిజర్వాయర్‌ నిర్మించాలని సీఎం కేసీఆర్‌ అధికారులకు సూచించారు.