ఈ కొత్త పరీక్షకు..కొవిడ్‌ జాడ చిక్కాల్సిందే!

లండన్‌: కరోనా సోకినా... కొన్నిసార్లు పరీక్షల్లో చిక్కడం లేదు. అయితే... పాలిమరైజ్‌ చైన్‌ రియాక్షన్‌ (పీసీఆర్‌), యాంటీబాడీ టెస్ట్‌లను మేళవించడం ద్వారా కరోనా జాడను మరింత సమర్థవంతంగా కనుగొనవచ్చని కేంబ్రిడ్జ్‌ యూనివర్సిటీ పరిశోధకులు పేర్కొన్నారు. వర్సిటీ అనుబంధ ఆసుపత్రిలో ఇప్పటికే ఈ విధానాన్ని విజయవంతంగా అమలు చేస్తున్నారు. వైద్య సిబ్బంది ప్రస్తుతం ముక్కు, నోటి నుంచి స్వాబ్‌ సేకరించి, పీసీఆర్‌ పరీక్ష నిర్వహిస్తున్నారు. వైరస్‌ అక్కడి నుంచి జారుకుని శరీరంలోని అవయవాలకు చేరుకోవడం వల్ల... కొందరిలో ‘నెగెటివ్‌’ ఫలితం వస్తోంది. మరోవైపు- వైరస్‌ సోకి కనీసం ఆరు రోజులు గడిస్తేగాని యాంటీబాడీ పరీక్షలో ఆ విషయం తెలియదు. ‘కేంబ్రిడ్జ్‌ ఇన్‌స్టిట్యూట్‌ ఆఫ్‌ థెరపిటిక్‌ ఇమ్యునాలజీ అండ్‌ ఇన్ఫెక్షియస్‌ డిసీజ్‌’కు చెందిన ప్రొఫెసర్‌ రవి గుప్త బృందం... ఈ రెండు పరీక్షలను మేళవించి, సరికొత్త ‘ఎస్‌ఏఎంబీఏ-2’ విధానాన్ని రూపొందించింది. వైరస్‌ సోకిందా? లేదా? అన్న విషయాన్ని ‘గోల్డ్‌ స్టాండర్డ్‌ టెస్ట్‌’గా చెబుతున్న ఈ పరీక్ష మరింత కచ్చితంగా నిర్ధారిస్తుందని పరిశోధకులు చెబుతున్నారు. కేంబ్రిడ్జ్‌ ఆసుపత్రిలో 45 మందికి ఈ టెస్ట్‌ చేయగా, 24 మందికి పాజిటివ్‌ ఉన్నట్టు తేలింది. ‘సెల్‌ రిపోర్ట్‌ మెడిసిన్‌’ పత్రిక ఈ వివరాలు అందించింది.