Corona: పరీక్షలకు ఖమ్మంలో బారులు

ఖమ్మం: ఖమ్మం జిల్లా కేంద్రంలో కొవిడ్‌ పరీక్షల కోసం ప్రజలు బారులుతీరారు. పాతబస్టాండు వద్ద ఏర్పాటు చేసిన కేంద్రంలో వందలాది మంది పడిగాపులు కాస్తున్నారు. ప్రజల్లో అవగాహన ఏర్పడుతుండటంతో చిన్నపాటి అనుమానిత లక్షణం ఉన్నా పరీక్షలకు తరలి వస్తున్నారు. ఖమ్మంలో ఉదయం 5 గంటల నుంచే వేచి ఉంటున్నారు. గంటల తరబడి క్యూలైన్లలో నిరీక్షించలేక తమ చెప్పులను వరుసలో పెట్టారు.

గ్రామీణ ప్రాంతాల నుంచి ప్రజలు తరలి వస్తుండటంతో ఖమ్మం, కొత్తగూడెం జిల్లాలోని అన్ని కేంద్రాల వద్దా రద్దీ నెలకొంటోంది. ఖమ్మం జిల్లా కేంద్రంలో ఒక్కొక్కరిని పరీక్షించేందుకు 5 నుంచి 7 నిమిషాల సమయం పడుతోంది. దీంతో ప్రజలు ఎదురు చూడాల్సిన పరిస్థితి ఏర్పడింది. దీనిపై ఉన్నతాధికారులు చొరవ తీసుకుని అదనపు సిబ్బందిని ఏర్పాటు చేయాలని ప్రజలు కోరుతున్నారు.