Viral news: మద్యం మత్తులో ఎద్దుపై సవారీ.. ఆపై ఏం జరిగిందంటే?

డెహ్రాడూన్‌: మద్యం మత్తు తలకెక్కితే చాలా మంది ఏం చేస్తున్నామనే విషయం మర్చిపోయి తమతో పాటు ఇతరులకూ ఇబ్బంది కలిగిస్తుంటారు. ఈ క్రమంలో ప్రమాదాలు కొనితెచ్చుకుంటుంటారు. తాజాగా ఉత్తరాఖండ్‌ (Uttarakhand)లో ఓ యువకుడు మద్యం మత్తులో చేసిన పని సామాజిక మాధ్యమాల్లో వైరల్‌గా మారింది. రిషికేష్‌(Rishikesh)కు చెందిన ఓ యువకుడు మద్యం మత్తులో ఎద్దు (Bull)పై సవారీ చేస్తూ తపోవన్‌ ప్రాంతంలో వీధుల్లో హల్‌చల్‌ చేశాడు. ఈ ఘటన మొత్తాన్ని రోడ్డుపై ఉన్న ఓ వ్యక్తి వీడియో తీసి సామాజిక మాధ్యమాల్లో షేర్‌ చేశాడు. యువకుడు అలా ఎద్దుపై స్వారీ చేస్తున్న సమయంలో అటుగా వెళ్తున్న వారు ఒకింత భయాందోళనకు గురయ్యారు. 

ఈ వీడియో సామాజిక మాధ్యమాల్లో వైరల్‌ కావడంతో ఉత్తరాఖండ్‌ పోలీసులు స్పందించారు. వీడియోను ఉత్తరాఖండ్‌ పోలీస్‌ అధికారిక ట్విటర్‌ ఖాతాలో షేర్‌ చేస్తూ.. ‘‘ మే 5న అర్థరాత్రి సమయంలో రిషికేశ్‌ తపోవన్‌ ప్రాంతంలో ఓ యువకుడు ఎద్దుపై స్వారీ చేస్తున్న వీడియో మా దృష్టికి వచ్చింది. వీడియో ఆధారంగా యువకుణ్ని అదుపులోకి తీసుకున్నాం. యువత ఎవరు జంతువులను హింసించవద్దని సూచిస్తున్నాం’’ అని ట్వీట్‌ చేశారు. ఈ వీడియో చూసిన నెటిజన్లు కొందరు జంతువులను హింసించడం సరికాదని కామెంట్ చేయగా, మరికొందరు అతను ఎద్దుపై సవారీ బాగా చేశాడు అంటూ కామెంట్లు చేస్తున్నారు.