Guntur: విద్యాశాఖ నిర్వాకం.. చనిపోయిన టీచర్‌కు ‘టెన్త్‌’ మూల్యాంకనం విధులు

గుంటూరు: చనిపోయిన మాస్టారుకు పదో తరగతి మూల్యాంకన విధులు కేటాయించడం అందరినీ విస్మయానికి గురి చేస్తోంది. గుంటూరు జిల్లా తెనాలి ఐతానగర్‌లోని ఎన్‌ఎస్‌ఎస్‌ఎం హైస్కూల్‌లో గణిత ఉపాధ్యాయుడు జి.నాగయ్య కొద్దికాలం కిందట చనిపోయారు. అయితే రేపటి నుంచి నిర్వహించనున్న పదో తరగతి మూల్యాంకన విధులు ఆయనకూ కేటాయిస్తూ జిల్లా విద్యాశాఖాధికారి ఉత్తర్వులిచ్చారు. 

దీనిపై ఆ పాఠశాల తల్లిదండ్రుల కమిటీ ఛైర్మన్‌ ఎం.రాజు సోమవారం స్పందన కార్యక్రమంలో ఫిర్యాదు చేశారు. విధుల పట్ల విద్యాశాఖాధికారి నిర్లక్ష్యంగా వ్యవహరించారంటూ ఫిర్యాదులో పేర్కొన్నారు. ఈ విషయమై తెనాలి డివిజన్‌ ఉప విద్యాశాఖాధికారిణి నిర్మలను వివరణ కోరగా.. పాఠశాల నుంచి వచ్చిన జాబితాను పంపామని, రికార్డుల పరంగా ఆయన చనిపోయినట్లు ఎటువంటి ధ్రువపత్రం సమర్పించలేదన్నారు.