అనంతపురం పీఎస్‌ వద్ద ఉద్రిక్తత

అనంతపురం: అనంతపురం గ్రామీణ పోలీస్‌స్టేషన్‌ వద్ద ఉద్రిక్త పరిస్థితులు నెలకొన్నాయి. ఇవాళ ఉదయం నుంచి మాజీ ఎంపీ జేసీ దివాకర్‌రెడ్డిని పోలీస్‌స్టేషన్లో కూర్చోబెట్టడాన్ని నిరసిస్తూ.. పీఎస్‌ ఎదుట బైఠాయించేందుకు తెదేపా నేతలు పల్లె రఘురాథరెడ్డి, పార్థసారథి, ఈరన్న ప్రయత్నించారు. దీంతో పోలీసులు వారిని అడ్డుకొని రెండో పట్టణ పోలీస్‌స్టేషన్‌కు తరలించారు. బెయిల్‌ ప్రక్రియ పూర్తిచేయానికి ఎంత సమయం పడుతుందో పోలీసులు చెప్పకపోవడంపై నేతలు ఆగ్రహం వ్యక్తం చేశారు. దీంతో ఎట్టకేలకు ముందస్తు బెయిల్‌ తీసుకొని దివాకర్‌రెడ్డిని పోలీసులు స్టేషన్‌ నుంచి పంపించారు.

పోలీసుల తీరును ఖండించిన చంద్రబాబు

జేసీ దివాకర్‌ రెడ్డిని పోలీస్‌స్టేషన్‌లో కూర్చోబెట్టడాన్ని తెదేపా అధినేత చంద్రబాబు ఖండించారు. నేతలు, కార్యకర్తలు జేసీని కలవకుండా ఆంక్షలు విధించడాన్ని ఆయన తప్పబట్టారు. బెయిల్‌ ప్రక్రియను వెంటనే పూర్తి చేయాలని పోలీసులను కోరారు.