ఏపీకి నాబార్డు రుణం మంజూరు

అమరావతి: ఏపీకి రూ.1931 కోట్ల రుణం మంజూరు చేస్తూ నాబార్డు నిర్ణయం తీసుకుంది. ఏపీ జలవనరుల అభివృద్ధి కార్పొరేషన్‌కు ఈ రుణాన్ని ఇవ్వనుంది. ఇన్‌ఫ్రాస్ట్రక్చర్‌ డెవలప్‌మెంట్‌ అసిస్టెన్స్‌ కింద ఈ రుణ మొత్తాన్ని మంజూరు చేస్తున్నట్లు నాబార్డు ప్రకటించింది. పశ్చిమగోదావరి జిల్లా చింతలపూడి ఎత్తిపోతల పథకం ప్రాజెక్టును పూర్తి చేసేందుకు రాష్ట్ర ప్రభుత్వం ఈ రుణాన్ని వినియోగించనుంది. పశ్చిమగోదావరి, కృష్ణా జిల్లాల పరిధి 33 మండలాల్లోని 410 గ్రామాలకు సాగు, తాగునీటిని అందించేందుకు ప్రభుత్వం ఈ ప్రాజెక్టును చేపట్టింది. గోదావరి వరద జలాలను మూడు దశల్లో మళ్లించేందుకు చింతలపూడి ఎత్తిపోతల ప్రాజెక్టు నిర్మించనున్నారు.  53.5 టీఎంసీల నీటిని ఈ ఎత్తిపోతల ప్రాజెక్టు ద్వారా పశ్చిమ గోదావరి, పశ్చిమ కృష్ణాలోని ప్రాంతాలకు తరలించాలని నిర్ణయించారు. ఖరీఫ్‌ సీజన్‌లో మొత్తం 4.8 లక్షల ఎకరాలకు నీరందించాలని ప్రభుత్వం లక్ష్యంగా నిర్దేశించింది. 2022 మార్చి నాటికి చింతలపూడి ఎత్తిపోతల పథకాన్ని పూర్తి చేయాలని ప్రభుత్వం భావిస్తోంది.