వైద్యులు తీసుకుంటున్న జాగ్రత్తలు తెలుసా..?

కరోనా మహమ్మారి దేశంలో క్రమంగా విస్తరిస్తోంది. దగ్గినప్పుడు, తుమ్మినప్పడు వచ్చే తుంపర్లతో ఈ వైరస్‌ వ్యాప్తి చెందుతోంది. చాలా సులువుగా ఈ వైరస్‌ సోకే అవకాశం ఉండటంతో పరీక్షలు నిర్వహించే సమయంలో తగిన జాగ్రత్తలు తీసుకుంటున్నారు వైద్యులు. అయితే కరోనా వైరస్‌ నిర్ధరణకు పరీక్షలు ఎలా చేస్తారు..? పరీక్షలు చేసే సమయంలో వైద్యులు ఎలాంటి జాగ్రత్తలు తీసుకుంటారు..? అనుమానిత వ్యక్తి నుంచి నమూనాలు ఎలా సేకరిస్తారో చాలా మందికి తెలియదు. కరోనా బాధితులకు సేవలందిస్తున్న వైద్య సిబ్బందికి వైరస్‌ సోకిన ఘటనలు దేశంలో ఎక్కువవుతున్నాయి. ఈ నేపథ్యంలో అనుమానితుల నుంచి నమూనాల సేకరణకు ప్రభుత్వం తగు జాగ్రత్తలు చేపట్టింది. దీనిలో భాగంగా నమూనా సేకరణ కేంద్రాల్లో గాజుతో కూడిన ప్రత్యేక గదులు ఏర్పాటు చేసింది. గదికి అవతల కూర్చున్న వ్యక్తి నుంచి వైద్యులు నమూనాలు సేకరిస్తారు. అనుమానిత వ్యక్తి కూర్చున్న ప్రదేశాన్ని పలుమార్లు శానిటైజ్‌ చేసిన తర్వాతే మరో వ్యక్తిని పరీక్షిస్తారు. ఇలా సేకరించిన నమూనాలను నిర్ధరణ కోసం ల్యాబ్‌లోకి పంపుతారు.