కరోనా కష్టం... గుండెనీరయ్యే దృశ్యం...

ఆగ్రా: కరోనా మహమ్మారి వ్యాప్తిని కట్టడి చేయడానికి దేశవ్యాప్తంగా లాక్‌డౌన్‌ కొనసాగుతున్న విషయం తెలిసిందే. అయితే ఈ క్లిష్ట సమయంలో పేద ప్రజలు తమ కనీస అవసరాల కోసం తీవ్ర ఇబ్బందులు ఎదుర్కొంటూనే ఉన్నారు. యూపీలో చోటు చేసుకున్న ఓ ఘటనకు సంబంధించిన ఫొటోలను చూస్తే పరిస్థితి ఎంత హృదయ విదారకంగా ఉందో అర్థమవుతోంది. రోడ్డు మీద ఒలికిన పాలను ఓ వ్యక్తి చిన్న మట్టి పాత్రలోకి ఎత్తుకుంటుండగా.. మరోవైపు ఆ ప్రక్కనే ఉన్న కొన్ని శునకాలు ఆ పాలను తాగుతున్నాయి.

ఆగ్రాలోని రాంబాగ్‌ చౌరాస్తాలో పాల కంటైనర్‌ బోల్తా పడింది. పాలన్నీ రహదారిపై ఒలికిపోయాయి. రోడ్డు మీద పడ్డ పాలను తీసుకునేందుకు ఆ వ్యక్తి చేసే ప్రయత్నం, ఆ పాలనే శునకాలు తాగుతుండటం చూసేవారి మనసులను కరిగిస్తోంది. కొవిడ్-19ను అదుపు చేసేందుకు లాక్‌డౌన్‌ను మే 3వ తేదీ వరకు పొడిగిస్తున్నట్టు ప్రధాని నరేంద్ర మోదీ ఈ ఉదయం ప్రకటించారు.