సింగపూర్‌లో విజృంభిస్తున్న కరోనా

ఆదివారం ఒక్కరోజే 931 పాజిటివ్‌ కేసులు

సింగపూర్‌ సిటీ: కరోనా మహమ్మారి విజృంభణతో సింగపూర్‌ విలవిల్లాడుతోంది. ఆదివారం ఒక్కరోజే కొత్తగా 931 పాజిటివ్‌ కేసులు నమోదయ్యాయి. దీంతో మొత్తం కేసుల సంఖ్య 13,624కు చేరుకున్నట్లు అక్కడి వైద్యారోగ్యశాఖ వెల్లడించింది. ప్రస్తుతం సింగపూర్‌ ఆసియాలో కరోనా ఇన్ఫెక్షన్‌ రేట్‌ ఎక్కువగా ఉన్న దేశాల్లో ఒకటిగా నిలుస్తోంది. దాదాపు 50.7 లక్షల జనాభా ఉన్న ఈ దేశంలో ఎక్కువ శాతం కేసులు దక్షిణాసియా వాసులు నివాసముండే ప్రాంతాల్లోనే వెలుగుచూసినట్లు సమాచారం.

పెద్ద సంఖ్యలో బెడ్లు..

ఈ క్రమంలో కరోనా కట్టడికి అక్కడి ప్రభుత్వం అన్ని చర్యలు ముమ్మరం చేసింది. ఇప్పటికే స్థానికంగా లాక్‌డౌన్‌ విధించింది. వైరస్‌ సోకినవారికి వేగంగా చికిత్స అందించేలా పెద్ద సంఖ్యలో బెడ్లను ఏర్పాటు చేస్తోంది. ఆసియాలోనే అతిపెద్ద ఏయిర్‌ షో నిర్వహణకు వేదికగా నిలిచే చాంగి ఎగ్జిబిషన్‌ సెంటర్‌లో దాదాపు 4 వేల మందికి చికిత్స అందిస్తోంది. ఆసియాలో కేసులపరంగా చూసుకుంటే సింగపూర్‌.. చైనా, భారత్, జపాన్‌, పాకిస్తాన్‌ తర్వాతి స్థానంలో ఉంది. ఇప్పటివరకు 12 మంది మృతి చెందారు.