ఒకే గొడుగు కిందకి నీటిపారుదల శాఖ: కేసీఆర్‌

హైదరాబాద్‌:  సాగునీటి సౌకర్యం కోసం ఎంత ఖర్చయినా పెట్టడానికైనా ప్రభుత్వం సిద్ధంగా ఉందని తెలంగాణ ముఖ్యమంత్రి కె.చంద్రశేఖర్‌రావు అన్నారు. వివిధ ప్రాజెక్టుల కాల్వల ద్వారా ఇప్పటివరకు సాగునీరు అందని ప్రాంతాలను గుర్తించి, వాటికి సాగునీరు అందించే ప్రణాళికపై సీఎం కేసీఆర్ సుదీర్ఘంగా సమీక్ష నిర్వహించారు.  నీటిపారుదల శాఖలోని అన్ని విభాగాలను వెంటనే ఒకే గొడుగు కిందకి తీసుకురావాలని అధికారులకు సీఎం మార్గనిర్దేశం చేశారు. 

‘‘ఎన్నో వ్యయ, ప్రయాసలకోర్చి రాష్ట్రంలో భారీ ప్రాజెక్టులు నిర్మిస్తున్నాం. ప్రాజెక్టుల ద్వారా వచ్చే నదీ జలాలను వీలైనంత ఎక్కువ వ్యవసాయ భూములకు అందించేలా కార్యాచరణ ప్రణాళిక తయారు చేయాలి. వీలైనంత ఎక్కువ మంది రైతులకు సాగునీటి సౌకర్యం కల్పించడానికి ప్రభుత్వం ప్రాధాన్యమిస్తోంది.  ప్రాజెక్టుల నీటితో ముందుగా చెరువులు, తర్వాత రిజర్వాయర్లు నింపాలి, చివరికి ఆయకట్టుకు అందించాలి. శ్రీరాం సాగర్ ప్రాజెక్టు పరిధిలోని వరద కాలువకు  వీలైనంత ఎక్కువ ఓటీలు ఏర్పాటు చేయాలి. దాంతోపాటు ఇతర స్కీములతో సాగునీరు అందని ప్రాంతాల చెరువులను నింపాలి ’’ అని సీఎం కేసీఆర్‌ ఆదేశించారు.