KCR: కేసీఆర్‌కు హిప్‌ రిప్లేస్‌మెంట్‌ సర్జరీ పూర్తి

హైదరాబాద్‌: మాజీ సీఎం, భారాస అధినేత కేసీఆర్‌ (KCR)కు యశోద ఆసుపత్రి వైద్యులు హిప్‌ రిప్లేస్‌మెంట్‌ (తుంటి ఎముక మార్పిడి) శస్త్రచికిత్సను విజయవంతంగా పూర్తి చేశారు. గురువారం రాత్రి ఎర్రవెల్లిలోని ఫామ్‌హౌస్‌లో కాలుజారి పడిపోయిన కేసీఆర్‌ని కుటుంబ సభ్యులు సోమాజిగూడ యశోద ఆసుపత్రికి తరలించిన విషయం తెలిసిందే. డాక్టర్‌ ఎంవీ రావు ఆధ్వర్యంలోని వివిధ విభాగాలకు చెందిన వైద్యుల బృందం పరీక్షల అనంతరం హిప్‌ రిప్లేస్‌మెంట్‌ శస్త్రచికిత్స చేయాలని నిర్ణయించారు. దీంతో శుక్రవారం సాయంత్రం వైద్యుల బృందం సుమారు నాలుగున్నర గంటల పాటు శస్త్రచికిత్స నిర్వహించింది.

సర్జరీ విజయవంతంగా పూర్తయిందని యశోద ఆసుపత్రి వైద్యులు వెల్లడించారు. శస్త్రచికిత్స తరువాత ఐవీ ఫ్లూయిడ్స్‌, యాంటీ బయోటిక్స్‌, నొప్పి నివారణ మందులతో చికిత్స అందిస్తున్నట్టు హెల్త్‌ బులిటెన్‌లో వెల్లడించారు. ఎనిమిది వారాల్లో కేసీఆర్‌ పూర్తిగా కోలుకుంటారని వైద్యులు తెలిపారు. శస్త్ర చికిత్స తర్వాత కేటీఆర్‌, హరీశ్‌రావు ఇతర కుటుంబ సభ్యులు కేసీఆర్‌ ఆరోగ్య పరిస్థితిపై వైద్యులతో చర్చించారు.