Health: చెమట వాసన చికాకు పెడుతోందా..?

ఇంటర్నెట్‌ డెస్క్‌: రోజుకు రెండు పూటలా స్నానం చేస్తున్నా చెమట వాసన పది మందిలో ఇబ్బంది పెడుతుంది. పౌడర్‌, డియాడరెంట్లు వాడుతున్నా ఈ సమస్య కష్టాలను తెస్తుంది. వేసవిలో ఉండే ఈ సమస్యను ఎలా వదిలించుకోవాలా? అని చాలా మంది ఆలోచిస్తుంటారు. కొందరు వైద్యుల వద్దకు వెళ్లినా ఈ సమస్య అంత త్వరగా వదిలిపోదు. అయితే, దీన్ని ఎలా అధిగమించాలో వైద్యులు పలు సూచనలు చేశారు. 

• ఏ పనైనా చేసినపుడు ప్రతి ఒక్కరికి చెమట పడుతుంది. కొందరికి ఎక్కువగా, మరికొందరికి తక్కువగా ఉంటుంది. అసలే చెమట రాని వారుండరు. ఇది ఆరోగ్యకరమే. కానీ కొంతమందికి చెమటతో పాటే దుర్వాసన వస్తుంది.
• చెమట వాసన వదిలించుకోవడానికి నీటిలో డెటాల్‌, రోజ్‌వాటర్‌.. ఏదైనా ఒకటి కొన్ని చుక్కలు కలుపుకొని స్నానం చేయాలి.
• బాడీస్ప్రే, ఫెర్‌ఫ్యూమ్‌ వాడుకోవచ్చు. ఎక్కువగా చెమట పట్టే చోట బేబీపౌడర్‌ చల్లుకోవాలి.
• ఎండలు తగ్గేదాకా కాటన్‌ దుస్తులు మాత్రమే వేసుకోవాలి. సింథటిక్‌ దుస్తులు మరింత చెమట వచ్చేలా చేస్తాయి.
• ప్రతి రోజు దుస్తులు మార్చుకోవాలి. లేకపోతే దుర్వాసనను మరింత పెంచుతాయి.
• చెమటతో శరీరం నుంచి జింకు లవణం అధికంగా పోతుంది. దీన్ని తిరిగి భర్తీ చేసుకోవడానికి బీన్స్‌, క్యారెట్‌, బఠాణీ లాంటి వాటిని ఆహారంలో ఎక్కువ మోతాదులో తీసుకోవాలి.
• సొంపు తింటే నోటినే కాదు.. శరీరంలో దుర్వాసనను దూరం చేస్తుంది. రోజూ ఒక చెంచా సొంపు తింటే మంచి ఫలితం ఉంటుంది.