Viral Video: భార్యకు ముద్దుపెట్టాడని భర్తను కొట్టారు..

అయోధ్య: నదిలో స్నానం చేస్తుండగా భార్యకు ముద్దుపెట్టాడని ఓ భర్తను అక్కడున్న వారు అసభ్య పదజాలంతో తిట్టడంతో పాటు కొట్టారు. ఈ సంఘటన ఉత్తరప్రదేశ్‌లోని ప్రముఖ పుణ్యస్థలం, శ్రీరాముడి జన్మస్థలమైన అయోధ్యలో చోటుచేసుకుంది. ప్రస్తుతం ఈ వీడియో సామాజిక మాధ్యమాల్లో వైరల్‌గా మారింది. 

అయోధ్యలో ప్రవహించే పవిత్ర సరయూనదిలో ఓ జంట స్నానం చేయడానికి అందులో దిగింది. ఈ క్రమంలో భర్త తన భార్యకు ముద్దుపెట్టాడు. దీంతో నదిలో పక్కనే స్నానం చేస్తున్న పలువురు అతడిని నది నుంచి పక్కకు లాగి తిట్టడంతో పాటు చేయిచేసుకున్నారు. అయోధ్యలో ఇలాంటి పనులు చేయడాన్ని సహించం అని ఆ గుంపులో ఉన్న ఒక వ్యక్తి అన్నాడు. ఈ విషయం పోలీసుల దృష్టికి వెళ్లడంతో దర్యాప్తు చేసి చర్యలు తీసుకుంటామని తెలిపారు.