విడాకులు తీసుకున్న ఆనందంలో బంగీ జంప్‌.. వికటించి ఆసుపత్రికి!

Representational image

ఇంటర్నెట్‌డెస్క్‌: విడాకులు తీసుకున్న ఆనందంలో ఇటీవల ఓ బుల్లితెర నటి ఫోటో షూట్‌ చేయించుకున్న విషయం గుర్తుంది కదా.. అచ్చం అలాంటిదే ఈ ఘటనే ఇది. తన భార్య నుంచి విడాకులు తీసుకున్న అనంతరం ఆనందంతో  పెద్ద సాహసమే చేశాడు. అది కాస్తా వికటించడంతో ప్రాణాలు మీదకు తెచ్చుకున్నాడు. బంగీ జంప్‌ చేసి ఆస్పత్రి బెడ్‌పైకి చేరాడు. 

బ్రెజిల్‌కు చెందిన రాఫెల్ డోస్ శాంటోస్ తోస్టా (22) అనే వ్యక్తి కొన్ని వ్యక్తిగత కారణాల వల్ల తన భార్యతో విడాకులు తీసుకున్నాడు. విడాకులు తీసుకున్న సందర్భంగా తనకు నచ్చిన పనులన్నీ చేస్తూ ఆనందంగా గడపాలనుకున్నాడు. అందులో భాగంగానే బంగీ జంప్‌ చేయాలని నిర్ణయించుకున్నాడు. దానికోసం బ్రెజిల్‌లోని కాంపో మాగ్రోలో బ్రిడ్జ్‌ స్వింగ్‌లో పాల్గొనడానికి వెళ్లాడు. ఆనందంగా 70 అడుగుల ఎత్తు నుంచి జంప్‌ చేయాలని వెళ్లి తాడు సాయంతో కిందకు దూకాడు. అంతలోనే తాడు తెగిపోవడంతో రాఫెల్‌ కిందనున్న నీటి కొలనులోకి పడిపోయాడు. అంత ఎత్తు నుంచి కిందకు పడటంతో మెడ విరిగింది. శరీరమంతా తీవ్ర గాయాలయ్యాయి. మొత్తానికైతే ప్రాణాలతో మాత్రం బయటపడ్డాడు. వాస్తవంగా ఈ ఘటన ఈ ఏడాది ఫిబ్రవరిలోనే జరగ్గా.. తాజాగా అతడు కోలుకోవడంతో వెలుగులోకి వచ్చింది.

‘విడాకులు తీసుకున్న అనంతరం నేను బంగీ జంప్‌ చేయాలనుకున్నా. కానీ ఇలా అవుతుందని అసలు ఊహించలేదు. ఆ రోజు కళ్లు తెరిచే సమయానికి నీటిలో ఉన్నాను. చుట్టూ ఉన్న వారు ‘కదలకు అలాగే ఉండు, నీకు సాయం చేయడానికి వస్తున్నారు’ అంటూ ఉంటే అసలేం జరిగిందో నాకు అర్థం కాలేదు. చాలా భయం వేసింది. చివరకు ఎలాగోలా ప్రాణాలతో బయటపడ్డాను. జీవితానికి ఎంతో విలువ ఉంది. దాన్ని లెక్క చేయకుండా ఎన్నో పిచ్చి పనులు చేశా’ అంటూ రాఫెల్‌ ఆ ఘటన గురించి చెబుతూ పశ్చాత్తాపం వ్యక్తం చేశాడు.